Oct 27, 2026

కూటమి అభ్యర్థులను గెలిపించండి : పట్టాభిరామ్ పిలుపు

కూటమి ఆధ్వర్యంలో విజయవాడలో భారీ రోడ్ షో



విజయవాడ: విజయవాడ కార్పోరేషన్ ఎన్నికలలో  టీడీపీ, జనసేన, బీజేపీ కూటమి తరఫున పోటీ చేస్తున్న అభ్యర్థులకు మద్దతుగా మంగళవారం నగరంలో జరిగిన భారీ రోడ్ షోలో తెలుగుదేశం పార్టీ జాతీయ అధికార ప్రతినిధి, స్వచ్ఛ ఆంధ్ర కార్పోరేషన్ చైర్మన్ కొమ్మారెడ్డి పట్టాభిరామ్ పాల్గొని, విస్తృత స్థాయిలో ప్రచారం చేశారు. ప్రజా సమస్యలను ప్రత్యక్షంగా తెలుసుకునేందుకు నిర్వహించిన ఈ రోడ్ షోకు ‘ప్రజా సంక్షేమ పర్యటన’గా పేరు పెట్టారు. ఎన్డీఏ కూటమి మేయర్ అభ్యర్థి వంగవీటి రాధాకృష్ణతోపాటు మాజీ ఎమ్మెల్సీ బుద్ధా వెంకన్న, ఆంధ్రప్రదేశ్ నూర్ భాషా దూదేకుల సంక్షేమ, అభివృద్ధి కార్పొరేషన్ చైర్మన్‌గా కె. నాగుల్ మీరా,  కూటమి తరఫున పోటీ చేసే కార్పోరేటర్ అభ్యర్థులు పాల్గొన్న ఈ ప్రజా సంక్షేమ పర్యటన విజయవాడ పశ్చిమ నియోజకవర్గంలోని పలు డివిజన్లలో  జరిగింది. ఈ సందర్భంగా కొమ్మారెడ్డి పట్టాభిరామ్ మాట్లాడుతూ, నిరంతరం ప్రజాసంక్షేమం కోసం పాటుపడే కూటమి అభ్యర్థులను ఈ ఎన్నికల్లో గెలిపించాలని కోరారు. రాష్ట్ర వ్యాప్తంగా కూటమి అభ్యర్థుల ప్రచారానికి మంచి స్పందన వస్తోందన్నారు. ఈ ఎన్నికల్లో కూటమి ఘన విజయం సాధిస్తుందని ఆశాభావం వ్యక్తం చేశారు. 

ఉదయం 10 గంటలకు  33వ డివిజన్ లో ప్రారంభమైన ఈ రోడ్ షో  41వ డివిజన్సి తార సెంటర్ నుంచి మిథిలా నగర్ లోకి ప్రవేశించి చనుమోలు వెంకట్రావ్ ప్లై ఓవర్ వరకు సాగింది. తొలుత ఈ రోడ్ షో 33వ డివిజన్ బాల భాస్కర్ నగర్ మీదుగా స్వాతి సెంటర్ చేరింది. అక్కడ నుంచి  34వ డివిజన్ గాంధీబొమ్మ రోడ్డు నుండి కోళ్ల ఫారం రోడ్డు వరకు, అక్కడి నుండి మానవ మందిర్ రోడ్డు మీదుగా స్వాతి రోడ్డులోకి ప్రవేశించింది.  38వ డివిజన్ లో  పీఆర్ కే. బిల్డింగ్ సెంటర్‌కు చేరుకుని, ఆ తర్వాత పాకల ప్రాంత వాసులతో ప్రత్యేక ఆత్మీయ సమావేశం నిర్వహించారు. ఇదే క్రమంలో  38,39వ డివిజన్ల ప్రజలను కలిశారు.  శివాలయం సెంటర్ నుంచి ప్రియదర్శిని కాలనీ 'సత్య ఫ్యాన్సీ' మొదటి రోడ్డు మీదుగా రోడ్డుకు ఇరువైపులా ఉన్న ఓటర్లను, స్థానిక ప్రజలను పలకరిస్తూ రోడ్ షో సాగించారు.  హౌసింగ్ బోర్డ్ కాలనీలో  300, 450 ఎస్.ఎఫ్.టి. కాలనీ రోడ్డు మీదుగా ప్రయాణించి, శ్రీ కృష్ణ మందిర్ రోడ్డు ద్వారా చర్చ్ సెంటర్‌కు చేరుకున్నారు. 41వ డివిజన్ చనుమోలు వెంకట్రావ్ ప్లై ఓవర్ వద్ద ఈ రోడ్ షో ముగించారు. 

Oct 26, 2026

ఉత్తరాల కోట - 1 గుంటూరు శేషేంద్ర శర్మ లేఖ



 సంస్కృత, ఆంధ్ర, ఆంగ్ల భాషల్లో పండితుడు,వచన కవిత్వం, పద్యరచన - రెండింటిలో సమాన ప్రతిభావంతుడు, ఆధునిక కవిత్వంలో తనదైన శైలిలో ప్రత్యేకత నిలుపుకున్న గుంటూరు శేషేంద్ర శర్మ శత జయంతి ఉత్సవాల సందర్భంగా ఆయన దస్తూరి ఎలా ఉంటుందో తెలుసుకోవడానికి  1999లో ఆయన నాకు రాసిన ఓ ఉత్తరం ఇక్కడ పోస్ట్ చేస్తున్నాను. 

1970 - 90 మధ్యలో నేను విపరీతంగా పుస్తకాలు చదివేవాడిని. జీవిత చరిత్రలు, సాంఘీక, చారిత్రక, డిటెక్టివ్ నవలలు, కథలు, నాటకాలు, నాటికలు, కవిత్వం, వ్యాసాలు... అన్ని చదివేవాడిని. బెంగాలీ సాహిత్యం, ఇంగ్లీష్ సాహిత్యం తెలుగు అనువాదాలు చదివేవాడిని. చలం, బుచ్చిబాబు, తాపీధర్మారావు, కొడవటిగంటి, సంజీవ్ దేవ్, రంగనాయకమ్మ,కోడూరి కౌసల్యాదేవి, యద్దనపూడి సులోచనా రాణి, యండమూరి....., షేక్‌స్పియర్, సోమర్ సెట్ మామ్...., శరత్ చంద్ర... తరిమెల నాగిరెడ్డి-తాకట్టులో భారతదేశం, కేంద్ర సాహిత్య అకాడమీ ప్రచురించిన భారతీయ భాషల అనువాద పుస్తకాలు చదివేవాడిని. 

రెండు వేలకు ముందు చాలా మంది రచయితలకు, రచయిత్రులకు లేఖలు రాసేవాడిని. వాళ్లు నాకు లేఖలు రాసేవారు.  నేను ఎన్ని ఊళ్లు తిరిగినా, ఎన్ని ఇళ్లు మారినా మెట్రిక్ హాల్ టికెట్ నుంచి అక్రిడేషన్ కార్డులు, లేఖలు... వంటి వాటిని భద్రంగా ఉంచడం నాకు అలవాటు.  

ఈ మధ్య తవ్వకాలలో  స్వాతంత్ర సమరయోధులు వావిలాల గోపాలకృష్ణయ్య, డాక్టర్ సంజీవ్ దేవ్,  గుంటూరు శేషేంద్ర శర్మ, ఆరుద్ర,  ఐపీఎస్ అధికారి పేర్వావారం శ్రీరాములు, ప్రపంచ ప్రఖ్యాత నైరూప్య చిత్రకారుడు ఎస్.వి.రామారావు, ప్రముఖ చిత్రకారులు డాక్టర్ మాచిరాజు రామచంద్రరావు,  అందే బాబా ప్రసాద్,  అప్పటి టీటీడీ ఈఓ ఎస్.లక్ష్మీనారాయణ, చలసాని ప్రసాదరావు(ఈనాడు), రేగడి విత్తులు నవలా రచయిత్రి చంద్రలత, పడమటి గాలి నాటక రచయిత పాటిబండ్ల ఆనందరావు, నడక వీరుడు ఎం.ఆదినారాయణ,  డాక్టర్ బీరం సుందర్రావు,అడిగోపుల వెంకటరత్నం, సాహితీ భూషణ్ పండిత రత్న విద్వాన్ గానుగపెంట హనుమంతరావు, గుంటూరు జిల్లా హేతువాద సంఘం అధ్యక్షులు, స్వాతంత్ర సమరయోధులు ఊరే కోటేశ్వరరావు... వంటివారితోపాటు నాకు కొత్త జీవితాన్ని ప్రసాదించిన అత్యంత ముఖ్యులు మాస్టర్ కందుల రామచంద్ర రావు, డిగ్రీ కాలేజీలో మా పాలిటిక్స్ లెక్చరర్ ఎన్. వి. ఎన్. కుటుంబరావు ఆంధ్ర యూనివర్సిటీలో అప్పటి మా లెక్చరర్ డాక్టర్ జాన్ వెస్లీ, స్వాతి పైప్స్ అధినేత కౌతవరపు శ్రీనివాసరావు, మా బంధువులలో ముఖ్యులు మా బావ బిట్రా ముకుందరావు, ఆయన భార్య, మా కజిన్ బిట్రా జ్ఞాన సామ్రాజ్యలక్ష్మి, మా అన్నయ్య మోహన్ దాస్ బాపూజీ, మా అక్క బూదాటి విజయలక్ష్మి, నా క్లాస్ మేట్స్, మిత్రులు గద్దె అచ్యుతరావు, తిప్పావఝ్జుల కుమార్, బిట్రా రామచంద్రరావు, కాలే నారాయణరావు, తిరువీధుల బాబురావు,అందే వెంకటేశ్వరరావు,  లాలో నా క్లాస్ మేట్ టి.కృష్ణ కుమార్... వంటి వారు  నాకు రాసిన లేఖలు బయటపడ్దాయి. చాలా ఉత్తరాలు మిస్ అవగా, ఇవి మిగిలాయి.  వాటిలో గుంటూరు శేషేంద్ర శర్మ గారు రాసిన లేఖ కూడా ఉంది. 

అప్పట్లో  నాకు లెటర్స్, పుస్తకాలు వంటివి పోస్ట్ లో చాలా వస్తుండేవి. ప్రతి రోజూ పోస్ట్ మ్యాన్ (పేరు ఖాసీం అనుకుంటా) మా ఇంటికి వచ్చేవారు. లేఖలు రాయడంలో ఒక్కొక్కరిది ఒక్కో శైలి.  ఆ లేఖలు, ఆ స్పందనలు, ఆ అనుభూతులు, ఆ వాక్యాలు, ఆ దస్తూరి, తెలుగు భాష సౌందర్యం... వేరు.  సోషల్ మీడియా రాకతో  అవన్నీ కట్ అయిపోయాయి. ఓ సారి ఎస్వీ రామారావు గారు అమెరికా నుంచి నాకు తెలుగులో లేఖ రాశారు. మా అమ్మాయి ఆ లెటర్ చూసి ‘‘అమెరికాలో ఉండే ఆయన తెలుగులో ఇంత చక్కగా లెటర్ రాశారేంటి డాడీ’’ అని ఆశ్చర్యం వ్యక్తం చేసింది. 


Oct 4, 2026

పల్లె ప్రజల గొంతుక, రైతాంగ పోరాటాలకు అక్షర ఆయుధం

 ‘జమీన్ రైతు’ వారపత్రిక


తెలుగు పత్రికా చరిత్రలో కొన్ని పత్రికలు కేవలం వార్తలను అందించే మాధ్యమాలుగా కాకుండా, ఒక సామాజిక ఉద్యమానికి ప్రతినిధులుగా, ప్రజల ఆకాంక్షలకు అక్షర రూపంగా నిలిచాయి. అలాంటి అరుదైన చరిత్ర కలిగిన వారపత్రికల్లో ‘జమీన్ రైతు’ ఒకటి. నెల్లూరు కేంద్రంగా వెలువడిన ఈ పత్రికకు దాదాపు శతాబ్ద కాలానికి చేరువైన ఘనమైన చరిత్ర ఉంది.
‘జమీన్ రైతు’ అనే పేరులోనే పత్రిక లక్ష్యం దాగి ఉంది. ‘జమీన్’ అంటే భూమి, ‘రైతు’ అంటే ఆ భూమిని సాగు చేసే వాడు. జమీందారీ వ్యవస్థ ప్రభావంతో రైతులు, కౌలు రైతులు ఎదుర్కొన్న దోపిడీ, అన్యాయాలు, సామాజిక అసమానతలను వెలుగులోకి తీసుకురావాలనే సంకల్పంతో ఈ పత్రిక రూపుదిద్దుకుంది. వ్యవస్థాపకుడు నెల్లూరు వెంకట్రామానాయుడు., పత్రిక తన మాస్ట్హెడ్లో 1930ను స్థాపన సంవత్సరంగా  చెబుతున్నది..
ప్రారంభంలో ‘జమీందారీ రైతు’ పేరుతో ప్రారంభమై, అనంతరం ‘జమీన్ రైతు’గా మారినట్లు చారిత్రక ఆధారాలు సూచిస్తున్నాయి. జమీందారీ దోపిడీకి వ్యతిరేకంగా ప్రజల్లో చైతన్యం కల్పించడమే కాకుండా, నెల్లూరు ప్రాంతంలో ఉప్పు సత్యాగ్రహం వంటి స్వాతంత్ర్యోద్యమ పరిణామాలకు కూడా పత్రిక ప్రాధాన్యం ఇచ్చింది. అంటే పత్రికా రచనను కేవలం సమాచార ప్రసారంగా కాకుండా, ప్రజా చైతన్య సాధనంగా ఉపయోగించింది.
స్వాతంత్ర్యోద్యమ కాలంలో స్వేచ్ఛాయుత పత్రికా రచన ఎంతటి సవాళ్లను ఎదుర్కొందో ‘జమీన్ రైతు’ చరిత్ర కూడా తెలియజేస్తుంది. 1941 ఫిబ్రవరి 15 నుంచి 17 వరకు బ్రిటిష్ ప్రభుత్వం వెంకట్రామానాయుడు నివాసం, కార్యాలయంతో పాటు అప్పటి సంపాదకుడు చుండి జగన్నాథం నివాసాన్ని సోదా చేసినట్లు చారిత్రక రికార్డులు పేర్కొంటున్నాయి. రెండో ప్రపంచ యుద్ధ సమయంలో ఏర్పడిన ఆంక్షల నేపథ్యంలో 1942 సెప్టెంబరు 1న పత్రిక ప్రచురణను తాత్కాలికంగా నిలిపివేసి, అదే సంవత్సరం నవంబరు 20న తిరిగి ప్రారంభించింది.
‘జమీన్ రైతు’ ప్రత్యేకత పల్లె జీవితాన్ని పత్రికా కేంద్రంగా మార్చడంలోనూ కనిపిస్తుంది. నగర రాజకీయాలకు మాత్రమే పరిమితం కాకుండా గ్రామీణ సమాజం, రైతు సమస్యలు, స్థానిక పరిణామాలు, ప్రజల కష్టనష్టాలకు ప్రాధాన్యం ఇవ్వడం ద్వారా జిల్లా పత్రికా రంగానికి ఒక ప్రత్యేక నమూనాను ఏర్పరచింది. పల్లెలను ప్రపంచానికి పరిచయం చేయాలన్న లక్ష్యంతో అది పనిచేసిందని పత్రిక చరిత్రపై వచ్చిన విశ్లేషణలు పేర్కొంటున్నాయి.
కాలం మారింది. జమీందారీ వ్యవస్థ అంతరించింది. సాంకేతిక పరిజ్ఞానం పత్రికా రంగ స్వరూపాన్ని మార్చింది. అయినప్పటికీ ప్రజా సమస్యలను అక్షరబద్ధం చేయడం, గ్రామీణ సమాజానికి గొంతుకగా నిలవడం అనే పత్రికా విలువలు మారలేదు.
ప్రెస్ రిజిస్ట్రార్ జనరల్ ఆఫ్ ఇండియా రికార్డుల ప్రకారం ‘జమీన్ రైతు’ తెలుగు వారపత్రికగా నెల్లూరు నుంచి నమోదై ఉంది. 1957లో దాని రిజిస్ట్రేషన్ నమోదైంది.
దాదాపు శతాబ్దానికి చేరువైన ఈ ప్రయాణం ఒక పత్రిక మనుగడ కథ మాత్రమే కాదు; రైతు, పల్లె, ప్రజాస్వామ్యం, స్వేచ్ఛాయుత పత్రికా రచనలతో ముడిపడిన తెలుగు జర్నలిజం చరిత్రలో ఒక ముఖ్య అధ్యాయం. కాలం మారినా ప్రజల పక్షాన నిలిచే పత్రికకు చరిత్రలో స్థానం ఉంటుందనే సత్యానికి ‘జమీన్ రైతు’ ఒక సజీవ సాక్ష్యం.  

                              

                                                                                  ----నందిరాజు రాధాకృష్ణ


వైద్యవృత్తికే తలమానికం డాక్టర్ అనూష


వైద్యం చేయడంలోనే కాదు పరిశుభ్రత పాటించడంలో ఆమెకామే సాటి

ఓపికే ఆమెకు అలంకారం

స్వచ్ఛతలో మంగళగిరికి మరోసారి రాష్ట్రస్థాయి గౌరవం

ముఖ్యమంత్రి నుంచి అవార్డ్ అందుకున్న మంగళగిరి ప్రభుత్వ డాక్టర్

డాక్టర్ అనూషకు సర్వత్రా ప్రశంసలు


మంగళగిరి: గుంటూరు జిల్లా మంగళగిరి గణపతి నగర్ లోని  ఇందిరా నగర్ యూపీహెచ్‌సీ(అర్బన్ ప్రైమరీ హెల్త్ సెంటర్)కి చెందిన డాక్టర్ అనూష పరుచూరి అన్ని వర్గాల రోగులకు ఎంతో ఓపికగా వైద్య సేవలు అందించడంలో  వైద్య వృత్తికే తలమానికంగా నిలిచారు . ప్రజా వైద్యంలో ప్రజల ప్రశంసలు అందుకుంటున్న డాక్టర్ అనూష సేవలను ప్రభుత్వం కూడా గుర్తించింది. హెల్త్ సెంటర్ లో,  పరిసరాల్లో ఆమె పాటించే పరిశుభ్రత ప్రమాణాల ఆధారంగా రాష్ట్రస్థాయిలో ఉత్తమ స్వచ్ఛ హాస్పిటల్ అవార్డు  లభించింది.  గాంధీ జయంతిని పురస్కరించుకుని స్వచ్ఛమైన, ఆరోగ్యకరమైన ఆంధ్రప్రదేశ్ నిర్మాణానికి కృషి చేస్తున్న వారిని గౌరవించేందుకు రాష్ట్ర ప్రభుత్వం విజయవాడ ఎ కన్వెన్షన్ సెంటర్‌లో శుక్రవారం రాత్రి  ప్రతిష్టాత్మకంగా  నిర్వహించిన ‘స్వచ్ఛ ఆంధ్ర అవార్డ్స్–2026’ రాష్ట్ర స్థాయి పురస్కారాల ప్రదానోత్సవంలో ముఖ్యమంత్రి నారా చంద్రబాబు నాయుడు డాక్టర్ అనూషకు ఈ అవార్డు అందజేశారు. మెడికల్ ఆఫీసర్(సివిల్ అసిస్టెంట్ సర్జన్)గా ఆమె చేసే సేవల వల్ల ఆమెకు అభినందనలు లభించడమే కాకుండా మంగళగిరికే మంచి గుర్తింపు లభించింది. డాక్టర్ అనూష వైద్యసేవలో ఎందరికో స్ఫూర్తిగా నిలిచారు. 

డాక్టర్ అనూష మార్చి 3, 1993న గుంటూరులో జన్మించారు.  ఏలూరులోని ఏఎస్ఆర్ ఏఎం మెడికల్ కాలేజీలో ఎంబీబీఎస్  పూర్తి చేశారు. ఎంబీబీఎస్ చదువుతున్న సమయంలో 2,790 మంది పాల్గొన్న అతిపెద్ద 'రొమ్ము క్యాన్సర్ స్వయం-పరీక్ష కార్యక్రమంలో పాల్గొని గిన్నిస్ వరల్డ్ రికార్డును సాధించారు. 2022  మార్చిలో మంగళగిరి ఇందిరా నగర్ హెల్త్ సెంటర్ లో ప్రభుత్వ వైద్యురాలిగా చేరారు. ఆమె బాధ్యతలు స్వీకరించే నాటికి ఈ హెల్త్ సెంటర్‌కు రోజుకు 10 మంది కంటే ఎక్కువ రోగులు వచ్చేవారు కాదు. ఆమె నిరంతర కృషి, అంకిత భావం,సేవా గుణం, రోగులతో ఆప్యాయంగా వ్యవహరించే తీరు వల్ల ప్రస్తుతం ఆ సంఖ్య రోజు రోజుకు పెరుగుతోంది. ఆమె అందించే విశేష సేవలకు  జాతీయ, రాష్ట్ర స్థాయిలో పలు అవార్డులు లభించాయి.  ఆమె నాయకత్వంలో ఇందిరా నగర్ హెల్త్ సెంటర్‌కి జూలై 2023లో నేషనల్ క్వాలిటీ అస్యూరెన్స్ స్టాండర్డ్స్ (ఎన్‌క్యూఏఎస్) సర్టిఫికేషన్ ద్వారా కేంద్ర ప్రభుత్వ గుర్తింపు లభించింది.  2024, ఆగస్ట్ 24న ఈ హెల్త్ సెంటర్ తరఫున 'రాష్ట్ర స్థాయి నాణ్యతా ప్రమాణాల అవార్డు' డాక్టర్ అనూష్ కు ఉత్తమ మెడికల్ ఆఫీసర్ అవార్డు అందుకున్నారు.ఈ ఏడాది జూలై 24న గుంటూరు జాయింట్ కలెక్టర్ నుండి 'ఉత్తమ డాక్టర్' ప్రశంసా పత్రాన్ని అందుకున్నాను.ఇవే కాకుండా రోటరీ ఐకానిక్ డాక్టర్ అవార్డు, రాష్ట్ర క్వాలిటీ అస్యూరెన్స్ అవార్డు,  శ్రీమతి నన్నపనేని లక్ష్మి స్మారక పురస్కారాలను కూడా ఆమె అందుకున్నారు. చేనేత కుటుంబాలకు చెందిన వారితోపాటు  వివిధ వృత్తులు చేసుకునే  నిరుపేదలైన రోగులు ఈ హెల్త్ సెంటర్ కి ఎక్కువగా వస్తారు. వారు అడిగే ప్రశ్నలకు డాక్టర్ అనూష ఎంతో ఓపికతో సమాధానాలు చెబుతారు. ఆ ఓపికే ఆమెకు మణి హారం. స్వచ్ఛ ఆంధ్ర అవార్డ్స్ అవార్డు అందుకున్న సందర్భంగా పట్టణ ప్రముఖులతోపాటు అన్ని వర్గాల ప్రజలు ఆమెకు అభినందనలు తెలుపుతున్నారు. 






కూటమి అభ్యర్థులను గెలిపించండి : పట్టాభిరామ్ పిలుపు

కూటమి ఆధ్వర్యంలో విజయవాడలో భారీ రోడ్ షో విజయవాడ: విజయవాడ కార్పోరేషన్ ఎన్నికలలో  టీడీపీ, జనసేన, బీజేపీ కూటమి తరఫున పోటీ చేస్తున్న అభ్యర్థులకు...