https://www.youtube.com/watch?v=3AyEmOCZ3Ag
మెగాస్టార్ చిరంజీవి స్వయంకృషికి మరో జాతీయ అవార్డు లభించింది. తన డిస్కో డ్యాన్సులు, ఫైట్స్ తో తెలుగు సినిమా గతిని మార్చిన సుప్రీం హీరో గాంగ్ లీడర్ మెగాస్టార్. తెలుగు సినిమా హీరో మెగాస్టార్ చిరంజీవిని చిత్ర రంగానికి చేసి సేవలకు గుర్తింపుగా ఇండియన్ ఫిల్మ్ పర్సనాల్టీ ఆఫ్ ద ఇయర్ - 2022 అవార్డుకు ఎంపిక చేసినట్లు కేంద్ర సమాచార, ప్రసార శాఖ మంత్రి అనురాగ్ ఠాగూర్ ప్రకటించారు. గోవాలో నవంబరు 20 ఆదివారం జరిగిన 53వ ఇంటర్నేషనల్ ఫిల్మ్ ఫెస్టివల్ ఆఫ్ ఇండియా ప్రారంభోత్సవంలో ఆయన ఈ ప్రకటన చేశారు. ఇంతకుముందు ఈ అవార్డుని వహీదా రెహమాన్, రజనీకాంత్, ఇళయరాజా, ఎస్పీ బాల సుబ్రహ్మణ్యం, హేమ మాలిని, అమితాబ్ బచ్చన్ అందుకున్నారు. సోషల్ మీడియా ట్విటర్ వేదికగా చిరంజీవి స్పందించారు. ఇలాంటి గౌరవంతో సత్కరించినందుకు మంత్రి అనురాగ్ సింగ్ ఠాకూర్కి, భారత ప్రభుత్వానికి ధన్యవాదాలు తెలిపారు. అభిమానుల ప్రేమ వల్లే తనకు ఈ అవార్డు అభించిందని, వారికి కూడా ధన్యవాదాలు తెలిపారు. చిరంజీవి పోషించే వైవిధ్యమైన పాత్రలు, అద్భుతమైన ఆయన స్వభావం తరతరాలుగా సినీ ప్రేమికులను ఆయన వైపు ఆకర్షించేలా చేస్తున్నాయని ప్రధాని నరేంద్ర మోదీ కొనియాడారు. చిరంజీవిగారిని ఎప్పటికీ మర్చిపోలేం అని ట్విటర్ లో పేర్కొన్నారు. సన్నివేశానికి తగిన నటన, ఎటువంటి భావాన్నయినా ఇట్టే పలికించే కళ్ళు, హీరో, విలన్, విలన్ ఛాయలున్న హీరో, భావోద్వేగం, హాస్యం, రౌద్రం, గాంభీర్యం, రొమాన్స్ ... ఏది కావాలంటే ప్రదర్శించే పరిపూర్ణ నటుడు చిరంజీవి.
1978లో పునాదిరాళ్లుతో తన సినిమా నటజీవితం మొదలుపెట్టిన కొణిదెల శివశంకర ప్రసాద్ మనవూరి పాండవులు సినిమాతో ప్రత్యేకతను చాటుకున్నారు. న్యాయం కావాలి, ఖైదీ వంటి చిత్రాలతో వరస హిట్లతో తెలుగు సినిమా దూకుడును కూడా పెంచారు. ఎంత ఎదిగినా ఎక్కడ వదిగి ఉండడం తెలిసిన, వీటన్నిటినీ మించి అబ్బురపరిచే వ్యక్తిత్వం కలిగిన మంచి మనిషి. మగధీరుడు, మగమహారాజు, హిట్లర్, మాస్టర్ వంటి హిట్లతో విజేతగా నిలిచి 153 సినిమాల అద్భుత ప్రస్థానంతో తెలుగు సినిమా ప్రయాణాన్ని మార్చారు. 1988లో స్వయంకృషి చిత్రానికి ఇండియన్ ఎక్స్ ప్రెస్ ఉత్తమ నటుడి అవార్డు, ఆంధ్రప్రదేశ్ ప్రభుత్వ నంది బహుమతి అందుకున్నాడు.1988లో చిరంజీవి సహ-నిర్మాతగా వ్యవహరించి నటించిన రుద్రవీణ చిత్రానికి జాతీయ సమగ్రతను బోధించే ఉత్తమ చిత్రంగా జాతీయ బహుమతి, 2002లో 2003లో సినిమా అవార్డులు, ఫిల్మిఫేర్ సౌత్ఇండియా అవార్డులు 1983లో, 1986లో,1993లో, 1994లో, 2000లో, 2003లో,2005లో ఉత్తమ నటుడు అవార్డులు, 2007లో స్పెషల్ అవార్డ్, 2011లో లైఫ్ టైమ్ అచ్చివ్ మెంట్ అవార్డు అందుకున్నారు. 1988లో, 1992లో, 2003లో ఉత్తమ నటుడుగా ఆంధ్రప్రదేశ్ నంది అవార్డులు అందుకున్నారు. 1998లో నేషనల్ ఫిల్మ్ నర్గీస్ దత్ అవార్డు అందుకున్నారు.
2006లో ఆంధ్ర విశ్వవిద్యాలయం గౌరవ డాక్టరేట్ తో సత్కరించింది. 2006లో భారతదేశపు మూడవ అత్యున్నత పౌర పురస్కారం పద్మభూషణ్, 2016లో రఘుపతి వెంకయ్య పురస్కారం, 2014లో సీమా అవార్డు అందుకున్నారు. సౌత్ ఇండియా ఇంటర్నేషనల్ మూవీకి సంబంధించి 2014లో అంబాసిడర్ ఆఫ్ ఇండియన్ సినిమా అవార్డు అందుకున్నారు. 2020లో జీ సినిమా ఉత్తమనటుడు అవార్డు అందుకున్నారు. ఐబీఎన్ లైవ్ 2013లో భారతీయ సినిమాను ప్రభావితం చేసిన వ్యక్తుల్లో ఒకడిగా చిరంజీవిని పేర్కొంది. ఇండియన్ ఫిల్మ్ పర్సనాల్టీ ఆఫ్ ద ఇయర్ - 2022 అవార్డు చిరంజీవి 45 ఏళ్ల కఠోర పరిశ్రమకు దక్కిన గౌరవం. అలుపెరుగని గమనంలో అధిరోహించిన మరో
చారిత్రక శిఖరం.
No comments:
Post a Comment